Петербург повестері, Николай Гоголь

Н. Гогольдің «Петербург повестері» циклі, негізінен, бес туындыдан тұрады. Қолдарыңыздағы кітапта соның үшеуі: «Нева проспектісі», «Мұрын» және «Портрет» берілген. Үш повестің де оқиғасы Петербургте өтеді. Әсіресе «Нева проспектісінде» Гоголь сырға толы шаһардың тіршілігін мол суреттейді. Шығарманың бас кейіпкерлері Пирогов пен Пискаревтің сүйіспеншілік сергелдеңдері арқылы жазушы кейде толассыз әрекеттің де соңы құрдымға кететінін меңзейді. «Мұрын» таңғаларлық тылсым оқиғаны баяндайды. Бас кейіпкер Ковалевтың мұрны иесін тастап, өзінше өмір сүреді. Хикаяттың мәні терең. Сырт келбеті жұртқа жұлдыздай жарқыраған, іші боскеуде адамдарды көз алдыңа әкеледі. «Портретте» Гоголь ақшаның буы барлық ізгілік атауының жауы екенін көрсетеді. Чартков деген бір кедей суретшінің өмірін күрт өзгерткен жайт кімді де болса терең ойлануға итермелейді.