Чеховтың қай әңгімесін оқысаң да жаныңды, көңіліңді тербейді. Оқиғалары ойыңнан кетпей қояды. Қолдарыңыздағы «Каштанка» атты кітапта ұлы жазушының жеті әңгімесі берілген. «Каштанка» өзге әңгімелерінен көлемділеу. Алайда, өте жеңіл оқылады. Іші эмоцияға толы. Титімдей Каштанкамен бірге қуанып, бірге мұңаясың, бірге түс көресің. Үйінен қожайынымен ере шыққан Каштанка адасып, өзге ортаға түседі. Мұндағы жағдайы бұрынғы өмірінен әлдеқайда тәуір әрі қызықты. Бірақ Каштанка түсінде көбіне бұрынғы өмірін, қарашаңырағын көреді. Одан әрі оқиға күрделене түседі. Жаңа машық, жаңа достар, жаңа сынақтар. Осының бәрі бұрынғы төл қожайыны мен оның баласына қауышқанға дейін жалғасады. Әңгіменің астары терең. Әрбір оқырман өз қорытындысын шығарғаны абзал.
«Каштанкадан» бөлек кітапта әйгілі жазушының «Үйде», «Ванька», «Қашқын», «Аққасқа», «Жұртта», «Көлікте» деген әңгімелері бар.
